Arrival in Boston :D

So ich meld mich etz mal scho wieder. Eigentlich hannich denkt ich schrieb denn erst wieder geg endi vom Camp will de Flug ja eh ned spannend isch. Normalerwis ischer das ja au ned, aber will ich natürlich debi gsi bin, isches ned eso gloffe wies hetti sölle :P Mer hend müesse über London flüge. Das heisst mer sind öbbe 60 EF lütlis uf London gfloge, mit chli verspötig, aber so wit, so guet. Z London hemmer 3 Stund müesse warte und nah und nah sind no die andre vode Schwiz wo mitm spötere Flug cho sind, und es par us Dütschland zue ois gstosse. Mit dene us Dütschland isch au eini vode EF Crew mitcho. Schlussendlich summer so geg die 120 Schüeler gsi. Mier alli hend also vorem Gate gwartet. D Boarding Time het und het sich verzögeret, will es im Flüger zheiss gsi isch, und sie irgend es küeligs Problem gha hend. Nach schliesslich enere Stund hemmer denn ine chene. Aber denn het er eifach ned welle starte. Mer hend gwartet und gwartet und gwartet. Mer hends zwar luschtig gha, und mitem eigete Bildschirm voredra hetmer sich scho chene Ziit umeschlah. Aber wo nach fast 2 Stund witerem warte d Asag cho isch, dassmer wieder use müend, wills im Cockbit immerna zheiss isch, isch ois den s Lache vergange. Die vode British Airways hend gseit mir chend denn ines Hotel gah. Guet. Also simmer use. Nur het eini de Pass im Flüger vergesse, voruf die EF- Frau mit dere zrug isch. Mier andre sind irgendwohi, und umegstande. Schlussendlich hemmer wieder e Stund gwartet gha und niemert het gwüsst was etz eich los isch. Irgendwenn isch denn ebbert uftaucht wo ois gseit het mer müend alles wommer gloffe sind, nachdem mer oisi Koffere gholt hend, wieder zrug laufe. Denn hemmer endlich chene is Hotel und am halbi 1 na ga znacht esse ^^. S Hotel isch also ned schlecht gsi, mit Fernseh im Bad :P
Am nächste Morge hemmer denn au recht früeh müsse ufstah, willmer das ganze Check-in züg halt namal hend müsse mache. Aber wommer denn alles gmacht hend und witer gwartet hend, het schliesslich alles klappt :) Am Flughafe z Boston simmer au grad abgholt worde, da isch wükli alles super organisiert gsi. Denn simmer mitm Bus zude Bryant University gfahre, wohnich etz bin. De Campus isch riesig. Am namittag hemmer bimne Rugbyspiel zuegluegt, woni aber überhaupt ned drus cho bin ^^suscht hemmer chli gredt, mehrheitlich Dütsch, obwohl mer das ja ned sett ^^ Ich bin imne 4er Zimmer mit ere Schwizerin, einre us Taiwan und einre us Norwege. Oises Zimmer isch zwar gross, aber ungmüetlich. Und Badzimmer chentet schlimmer fast ned si.. Aber naja, was sölls. Morn gahts denn richtig mitm Program los, und ich bin jetz scho kaputt vo dem viele Lüt kennelehre und immer s gliche verzelle... So jetz bini ziemlich müed, will ich han im Flüger eich nüt gschlafe und somit isch für mich halbi 5i :O
Also guet Nacht :*

Goodbyes are not for ever, goodbyes are not the end. They simply mean 

"I'll miss you, until we'll meet again!"

Ich wird oii alli extreeeeem vermisse :'( </3

Abflug :)

so, vor es paar Minute bini mit packe fertig worde. De Koffer isch echli zschwer und irgendwie hanni e Täsche zviel O.o Ich hoff eifach die mached kei Problem bim Flughafe :) Am Zistig am 4ii, ghats denn richtig los. Ich flüg zerst uf London und denn uf Boston is Bryant Camp mit 400 anderne EF Schüeler. Det bliebemer denn bis am 3. August und denn gahts ab uf Grand Haven. Denn erst wirdich au s erstmal d Anna, mini Gastschwöster us Dänemark gseh, da sie im andere Camp isch :/ Aber jaa.. ich froi mich, und d Ufregig haltet sich zwar nochli in Grenze. Nur amigs wie vorher bim Packe hanni so chli Nervositätsafäll, aber die sind erstunlich wenig :D
Uf jede Fall, jetzt gnüssi no 1,2 Täg da dehei, und duen mich echli vo de letzte stressige Wuche erhole, wo würkli jede Tag verplant gsi isch. Ich hoff ich chan denn in Grand Haven nochli an Strand go relaxe, wenns s Wetter bis denn na guet isch :)